Ramin Musayev: "Abşeron" dağıldı"

"I divizionda 3-cü pillədən sonrakı yerləri tutan klublara müraciət edəcəyik"

28.06.2011 | 30 dəfə oxunub

 2010-2011-ci il mövsümündə I divizionun qalibi kimi Premyer Liqaya vəsiqə qazanan "Abşeron" klubu dağılıb. Stadium.Az xəbər verir ki, bu barədə məlumatı Peşəkar Futbol Liqasının (PFL) prezidenti Ramin Musayev təsdiqləyib.
Musayev bildirib ki, buna sponsorların klubu maliyyələşdirməkdən imtinası səbəb olub. PFL prezidenti Premyer Liqada "Abşeron"u I divizion komandalarından birinin əvəzləyəcəyini söyləyib: "Bildiyiniz kimi, I diviziondan Premyer Liqaya "Abşeron" və "Rəvan" vəsiqə qazanmışdı. "Abşeron"un imtinasından sonra I divizionda 3-cü pillədən sonrakı yerləri tutan klublara müraciət edəcəyik. Hansı klubun imkanları Premyer Liqanın tələblərinə cavab versə, onu da cəlb edəcəyik. Seçim qarşısında qalsaq, I divizionu daha yüksək pillədə bitirən kluba üstünlük verəcəyik".
Öz növbəsində "Abşeron" klubunun prezidenti Yaşar Rüstəmov rəsmi açıqlamanın yaxın günlərdə veriləcəyini söyləyib: "Ola bilsin, klubumuzun idarə heyəti və məşqçiləri dəyişsin. İndi bütün jurnalistlərə ayrı-ayrılıqda cavab vermək imkanım yoxdu. Bu barədə yaxın günlərdə rəsmi açıqlama yayacağıq"

http://www.stadium.az/